شباب رايق

الحلقة الثانية
(امسح كل ذنوبك)
+ايه الاخبار

ده انت عملت امبارح فيا حتة مقلب قعدت تحمسنى وفى الاخر علقتنى ومشيت
عارف وكان قصدى
ايه!! طيب ليه كده؟
لان لو اخدت كل حاجة مرة واحدة هتتحمس شويه وبعديها بساعة ولا كأن فى اى حاجه
كلامك مظبوط
وخلى بالك كل حلقة هيكون نفس النظام
بس على الله يجى بفايده
قلتلك امبارح ثق في الله وما تحملش هم
ماشى.. مش ندخل فى الموضوع بقى
ماشى.. يلا
3..2..1..
السلام عليكم ورحمة الله
وعليكم السلام ورحمة الله
إيه الأخبار
تمام.. الحمد لله
طبعا زى ما أنت عارف إن حلقتنا النهاردة عن ازاي نمسح كل ذنوبنافي البداية لو قلتلك ممكن تعد ذنوبك اللى عملتها من يوم ما أتولدت
ايه .. انت بتكلمنى انا..
طب بلاش .. ممكن تعد ذنوبك اللى عملتها طول الاسبوع ده
يا عم انا ماشى ... أنت جاى تفكرني باللى فات
استنى أنا قصدي إن أنت ما تعرفش تعد الذنوب اللى عملتها النهاردة أساسا ومحدش يقدر يعدها إلا الله
صح
إذن ما حدش يقدر يمسحها إلا الله
ونعم بالله
ولكن ازاى نخلى ربنا يغفر (يمسح) لنا كل ذنوبنا
ازاى ..قول أنت؟؟
بصراحة مش أنا اللى هقولك
أمال مين ..؟
اللى هيقولك هو اللى هيغفر لك كل ذنوبك..حيث قال عز وجل(فقلت استغفرو ربكم انه كان غفارا)
صدق الله العظيم.. يعنى ربنا ممكن يغفر لى ذنوبى كلها
انت مش مصدق ربك ولا ايه؟؟!!
أنا مصدق والله ده حتى كلام ربنا بس انا مش متخيل يعنى ربنا هيسامحنى فى كل اللى عملته؟
أنا عارف انك فرحان أوى علشان كده اسمع الحديث القدسي الجميل ده (يا ابن آدم لو أتيتني بتراب الأرض خطايا ثم لقيتني لا تشرك بي شيئا أتيتك بترابها مغفرة)...
طب ولو ذنوبى اكتر
ممكن ما تقاطعنيش تأني
أنا آسف بس أنا فرحان اوى
عارف بس اسمع للآخر
ماشى أنا آسف
(يابن ادم لو بلغت ذنوبك عنان السماء ثم استغفرتني غفرت لك ولا أبالي) أنت واخد بالك من حاجه
ايه؟؟
إن ربنا بيقول غفرت على طول يعنى ما فيش قبلها ثم ولا حتى فاغفر
طب ودى فيها ايه
فيها كتير.. إن الله لو قال ثم قبل غفرت معنى كده إن في فترة ما بين استغفارك لربنا وان ربنا يغفرها لك ونفس الكلام في لو كانت فاغفر مع إن اللغة بتقول إن الفاء تدل على سرعة التنفيذ ولكن خلى بالك إن حتى لو في سرعة في عمل شئ برضه هتاخد وقت حتى لو ثانية واحدة بس اخدت وقت ولكن ربك عظيم اووووووووى إن معنى إن ربك ما يقولش ولا (ثم )ولا(ف) معنى كده ان مفيش اى وقت ما بين نطقك للاستغفار وان ربنا يغفرها لك
ياه ..اد ايه رينا كريييم أوى
والله ربك عظيم جدا ولكن احنا اللى مش واخدين بالنا ولو تاخد بالك إن في جميع آيات القرآن ربك بيقدم صفة الغفران عن اى شئ يعنى مثلا (ان الله غفورا رحيما) ربنا قدم صفة الغفران عن الرحمة لان استحاله ربنا يرحم شخص كثير الذنوب وبالتالى ربنا هيغفر له ذنوبه وبعده ربنا يرحمه ولو افترضنا ان قلبك حتة قماشة بيضة وكل لما تعمل ذنب الذنب ده يعمل نقطة سوداء على القماشة اظن كده حتة القماشة بتاعة كل واحد اتحرقت مش اسودت
صح
وخلى بالك ان حبيبك النبى شبه القلب كأنه حتة حديده والذنوب كأنه الصدأ اللى على الحديده والاستغفار هو المنظف لهذا الصدأ طب ما تجى نلمع قلوبنا بقى
والله انا نفسى بس التلميع هيجهدنى أوى وهيتعبنى
أهم حاجه انت ازاى بتستغفر ربنا هل بتستغفر من فمك ولا من قلبك
طب ازاى استغفر من قلبى
بأنك وانت بتستغفر تكون واثق من ان ربنا هيغفرلك
ونعم بالله طب ازاى استغفر ربنا ؟؟
فى اذكار كتييير جدا يعنى مثلا (استغفر الله) (استغفر الله العظيم واتوب اليه) (استغفرك اللهم واتوب اليك) وفى اذكار كتييير ولكن لو تلاحظ ان النصف الاول لو مشيت على حلقة النهارده اتحقق وهو ان ربنا يغفرلك ولكن ازاى تتوب لربنا بجد وازاى تعرف ان ربنا تاب عليك
اه ..ازاى ؟؟
ده للى هتعرفو فى الحلقة الجاية ولكن واجبك من النهاردة تكثر من الاستغفار علشان نتظف قلبك من اى قذارة واكيد القذارة على قلوبنا كتيير وفى الحلقة التالتة هنتوب بجد لربنا
طب ما تقول اى حاجه
انا قلت بكرة ان شاء الرحمن يلا..السلام عليكم
برده بتعلقنى.. وعليكم السلام
إلى اللقاء في الحلقة القادمة